दुरांतोचे इंंजिनसह 9 डबे घसरले, 10 दिवसांत तिसरा मोठा अपघात, कल्याण- कसारा रेल्वे वाहतूक विस्कळीत

मुंबई -नागपूर- मुंबई दुरांतो एक्सप्रेसचे इंजिनसह 9 डबे आज (मंगळवारी) सकाळी रुळावरून घसरले. आसनगाव-वाशिंद स्टेशनदरम्यान हा अपघात झाला आहे. यात काही प्रवाशी जखमी सुद्धा झाले आहेत. परिसरात गेल्या काही दिवसांपासून पाऊस सुरू आहे.

अपघात झाला तेव्हाही पाऊस सुरूच असल्याने मदत कार्यात अडथळे आले आहेत. तरीही सर्वच प्रवाशांना सुरक्षित स्थळी पोहोचविण्यात आल्याची माहिती मध्य रेल्वेच्या सूत्रांनी दिली आहे. विशेष म्हणजे, देशात रेल्वे अपघाताची 10 दिवसांतील ही तिसरी मोठी दुर्घटना आहे. अपघातामुळे कल्याण- मनमाड रेल्वे मार्ग पूर्णपणे ठप्प झाला आहे. परीणामी अनेक रेल्वे गाड्यांचा मार्ग बदलण्यात आला आहे. भुसावळकडे जाणार्‍या गाड्या कल्याण-लोणावळा-पुणे-दौंड-मनमाडमार्गे रवाना करण्यात आल्या आहेत.

मध्य रेल्वेने दिलेल्या माहितीनुसार, आसनगाव-वाशिंद स्टेशनजवळ मंगळवारी सकाळी 6 वाजून 40 मिनिटाला हा अपघात घडला आहे. स्थानिक लोकांनी डब्यांमध्ये अडकलेल्या प्रवाशांना बाहेर काढले. नंतर रेल्वे प्रशासनाने युद्ध पातळीवर बचावकार्य सुरु केले.
- रेल्वेतर्फे प्रवाशांसाठी पर्यायी बसची व्यवस्था करण्यात आली आहे.

सर्व प्रवाशांना सुरक्षित ठिकाणी हलविले... - रेल्वे